• 2022-07-15

Kurrikula e trajnimit për trajnerë dhe mësues lidhur me zbatimin e modelit “STEAM” është hartuar nga një ekip ekspertësh të shkencave të natyrës, të teknologjisë, të teknologjive të informacionit dhe komunikimit, të dizajnit, të arkitekturës, të matematikës dhe arteve në Universiteti “Barleti“ dhe të huaj.

Ky produkt paraprak vjen si kërkesë e zbatimit të projektit “Edukimi i të rinjve nëpërmjet modelit-STEAM“, që mbështetet nga Bashkia Tiranë në kuadër të vitit evropian të Tiranës. Prej tre vitesh Departamenti i Shkencave të Edukimit në universitet ka diskutuar, ka ndarë ide dhe ka pilotuar elemente të modelit mësimor “STEAM” me studentë dhe mësues në programet master të edukimit, por dhe me mësues nga shkollat që bashkëpunojmë duke mundësuar zbatimin në orë mësimore të
metodave dhe teknikave mësimore që lidhen thelbësisht me këtë qasje bashkëkohore, të nxëni.

Frut i këtij bashkëpunimi ishte dhe zhvillimi me datë 9 prill 2022 në Universitetin “Barleti“i konkursit “Albanian Science, Engineering, Design“- (ASED) -Fair në të cilin morën pjesë 150 nxënës të gjimnazeve dhe shkollave profesionale publike dhe jopublike nga Shqipëria, Maqedonia e Veriut dhe Kosova. U shpallën 10 fituesit më të mirë, të cilat do të jenë konkurues në Stamboll-Turqi në shtatro 2022, në një organizim botëror.Produktet e nxënësve dhe ekipeve të tyre u mbështeten në modelin“STEAM“ të të nxënit, një përvojë kjo e konsoliduar në vendet perëndimore.

Materiali “Kurrikula e trajnimit për trajnerë dhe mësues për përdorimin e modelit- STEAM” trajton çështje që lidhen me parimet dhe filozofitë ku bazohet kjo mënyrë e suksesshme të nxëni në vendet perëndimore, evidenton të nxënët e bazuar në probleme nga jeta reale dhe në kërkim shkencor. Gjithashtu trajton mësimin e integruar dhe atë të zgjidhjes së problemeve dhe modelin e “klasës së thyer“.

Nga nga ana tjetër shpjegon në mënyrë të argumentuar dhe nga burime e praktika të ndryshme, të studiuara se çfarë është “STEAM“, fushat kurrikulare të studimit në të, mjedisi i të nxënit në këtë model.
Pjesë të rëndësishme të materialit janë hapat kyç për planifikimin e mësimit sipas këtij modeli, ku theksojmë respektimin e plotë dhe lidhjen e ngushtë me kurrikulën e zbatuar me qasje kompetencash në gjimnaz, si dhe mundësojmë një lidhje të efektshme midis formatit të rekomanduar të planit të orës mësimore, që përdorin aktualisht mësuesit e gjimnazeve, me formatin që përdor modeli “STEAM“.

Një pjesë me interes janë dhe modelet e mësimit sipas “STEAM“ tek të cilat grupet e interesit do të lehtësohen që të zbatojnë në mënyrë të efektshme këtë metodologji mësimdhënie dhe të nxëni në klasa, që synon të pasurojë dhe të motivojë të nxënët e të rinjve.
Ky është një material paraprak, i cili do të zgjerohet dhe pasurohet më shumë gjatë zbatimit të projektit në 5 gjimnaze të Tiranës, por mbetet një material domethënës që mundëson trajnimin e trajenerëve dhe mësuesve për të planifikuar, për të përcjellë dhe për të zbatuar orë mësimore me anë të modelit “STEAM"

Për të lexuar materialin ju lutem klikoni këtu