Industria në Barleti: Studentët përfitojnë nga ekspertiza e tregut real

Industria në Barleti: Studentët përfitojnë nga ekspertiza e tregut real - Barleti University

Industria në Barleti: Studentët përfitojnë nga ekspertiza e tregut real

2026-03-23

Universiteti Barleti vijon të forcojë lidhjen mes akademisë dhe industrisë përmes iniciativës “Industria në Barleti”, duke u ofruar studentëve mundësi konkrete për të përfituar nga përvoja e drejtpërdrejtë e profesionistëve të tregut.

Në këtë kuadër, studentët e Departamentit të Ekonomisë, Sipërmarrjes dhe Financës zhvilluan një aktivitet me pjesëmarrjen e ekspertëve të Raiffeisen Bank, të cilët ndanë njohuri dhe praktika mbi marketingun dixhital dhe zhvillimin e aplikacioneve të orientuara drejt gjeneratës Gen Z.

Gjatë këtij bashkëbisedimi, studentët u njohën me strategji konkrete të përdorura në treg, sfidat aktuale të sektorit dhe mënyrat se si institucionet financiare po përshtaten me zhvillimet teknologjike dhe kërkesat e brezit të ri. Ky shkëmbim përvojash shërben si një urë lidhëse mes teorisë dhe praktikës, duke i pajisur studentët me njohuri të aplikueshme në karrierën e tyre të ardhshme.

Kjo nismë reflekton qasjen e Universitetit Barleti si një institucion aplikativ dhe sipërmarrës, i fokusuar në përgatitjen e studentëve për tregun e punës dhe zhvillimin profesional në një mjedis gjithnjë e më dinamik.

Universiteti Barleti shpreh mirënjohjen për kontributin e dhënë nga ekspertët Vjola Mato, Endri Pano, Rudina Hysaj dhe Tea Muzhaqi, të cilët ndanë përvojën e tyre me studentët dhe kontribuan në pasurimin e këtij aktiviteti.