• 2014-02-06

Instituti Shqiptar për Çështjet Publike (AIPA) dhe Universiteti Barleti (UB), në partneritet me Organizatën për Sigurim dhe Bashkëpunim në Evropë (OSBE) - Prezenca në Shqipëri - organizuan ditën e enjte, datë 6 shkurt 2014, temën e dytë në kuadrin e ciklit të trajnimeve mbi "Rolin e OSBE-së dhe kontributin e saj në Shqipëri ". I ftuar këtë radhë ishte ambasadori Florian Raunig (Kryetar i OSBE - Shqipëri), i cili u prit nga anëtari i bordit të Universitetit Barleti z. Paolo Rago, rektori i UB, Prof. Marenglen Spiro, dekania e Fakultetit të Shkencave Sociale, Dr. Saemira Pino-Gjipali dhe Drejtori i Institutit Shqiptar për Çështjet Publike, Dr. Dorian Jano.

Ambasadori Florian Raunig ligjëroi temën “OSBE në Shqipëri”. Leksioni ishte ndërveprues dhe i mbushur me informacion tërheqës për të gjithë pjesëmarrësit rreth organizatës që ai përfaqëson.

Fillimisht z. Rauning tërhoqi vëmendjen e të pranishmëve duke prezantuar përvojën e tij të parë në Shqipëri në vitet e vështira 1996-1997 e me pas vazhdoi me disa pyetje studentëve, për të vlerësuar sa njihej prej tyre roli i OSBE në fillimet e saj në Shqipëri në ‘97-ën. Studentët rreshtuan disa arsye përse duhej prezenca e OSBE-së në ato momente për vendin tonë të zhytur në anarki, kur njerëzit rrëmbyen armët për tu mbrojtur pasi Shqipëria u nda në zona të bandave të armatosura. Z. Rauning shpjegoi se në këtë moment anarkie kur shteti mungonte, reagimi i jashtëm solli forcat ushtarake (Operacioni Alba)me mandat shumë të ngushtë për të mbrojtur vëzhguesit e zgjedhjeve (ODIHR). Kjo pati efekt psikologjik pozitiv tek populli, por bandat e kuptuan shpejt këtë rol të kufizuar të tyre.

Në këto momente tepër të rënda për popullin shqiptar duhej një organizëm i paanshëm për të ndikuar në stabilizimin e vendit, që ishte OSBE sepse në thelbin e vet është organizata për siguri e stabilitet, është organizata me shtrirje më të gjerë në këtë fushë, ku edhe Shqipëria është anëtar. Pasi pa pëlqimin e Shqipërisë u nënshkrua një kontratë me shtetin dhe sot ajo bashkëpunon me objektiv kryesor stabilizimin e vendit. Në Shqipëri OSBE ka Prezencë dhe jo Mision.

Z. Rauning foli gjerësisht për mënyrën e bashkëpunimit me qeverinë shqiptare në momentet e vështira të 97-ës dhe se si ky organizëm respekton përherë të drejtat e palëve.

Më tej ambasadori shpjegoi mandatin dhe strukturën e OSBE-së në Shqipëri. Ka 4 departamente, dhe një staf prej rreth 80 vetë prej të cilëve, 21 janë të huaj dhe të tjerët shqiptarë. Organizata punon në fushën e demokratizimit të vendit, për një qeverisje të mirë, për fuqizimin e të drejtave të njeriut, bashkëpunon me median, duke e nxitur të jetë sa më e lirë dhe e pavarur nga forcat politike, bashkëpunon me shoqërinë civile në të gjitha këto fusha që përmendëm.

Duke qenë e vendosur në një vend pjesëmarrës të OSBE-së, ajo është partnere e Shqipërisë dhe do të ofrojë mbështetjen me prezencën e vet deri sa ky vend të dalë nga tranzicioni. Ambasadori e vuri theksin që njerëzit në Shqipëri duhet të kuptojnë rëndësinë e institucioneve dhe fuqizimin e tyre. Duke folur për Shqipërinë, ai u shpreh se ajo ka qenë përherë faktor stabiliteti e sigurie në rajon, por problemi qëndron brenda vendit, midis palëve politike që duan arbitër për t’u kuptuar.

Studentët bënë një sërë pyetjesh nisur nga situata aktuale e të dy poleve politike, kontributin e OSBE-së dhe ecurinë e saj.

ISHÇP do të zhvillojë edhe katër tema të tjera që do të trajtohen nga shefat e departamenteve të OSBE-së, për rolin dhe detyrat e tyre përkatëse në Shqipëri, ç’ka i nxit studentët të jenë pjesë e këtyre bashkëbisedimeve të gjalla.


Mirë u takofshim më 25 shkurt, ora 11:00, në temën“Institucionet Demokratike, Shoqëria Civile dhe Zhvillimi i Medias