• 2015-03-17

Në datën 17 Mars 2015, ora 16:30, Ambasada Japoneze në Shqipëri (me seli në Romë) dhe Fondacioni i Japonisë në bashkëpunim me “Universitetin Barleti” organizoi eventin kulturor me titull “Dita e Japonisë në Shqipëri”.

Ky aktivitet u organizua ne ambientet e universitetit tonë në kuadër të kurseve të gjuhës japoneze që prej 3 vitesh zhvillohen falas nga dr.Dritan Fino, si dhe nën përkujdesin e Ambasadës Japoneze dhe Fondacionit Japonez.

Në aktivitet morën pjesë zv.Ambasadori i Japonisë në Shqipëri, Përfaqësuesi i Konsullatës së Japonisë në vendin tonë, artistë, të ftuar nga Japonia, studentë, pedagogë të universitetit si dhe një prezencë e konsiderueshme të ineresuarish, ku spikasnin në mënyrë të veçantë të rinjtë pjesë e kursit të gjuhës japoneze.
Zv.Ambasadori i Japonisë në Shqipëri z.Hideo Fukushima si dhe të ftuarit nga Japonia u pritën fillimisht nga Rektori i “Universiteti Barleti”, Prof.Dr.Marenglen Spiro, gjatë takimit krahas falënderimeve të rastit u theksua rëndësia e vazhdimit të kurseve të gjuhës japoneze, si elementi kryesor përçues i kulturës së një vendi.

Aktiviteti u zhvillua në katër pjesë: Pjesa e parë iu dedikua muzikës tradicionale japoneze me pjesëmarrjen e znj. Akiko Sakurai, e cila luajti tri këngë karakteristike të shoqëruara me instrumentin BIWA, instrument tipik japonez. BIWA është me origjinë nga Persia e largët, Irani i sotëm dhe është përdorur për herë të parë që në vitin 1300. Pjesët muzikore u shoqëruan edhe me fragmente shpjeguese rreth instrumentit, veshjes karakteristike (Kimono) si edhe historisë së muzikës.

Në pjesën e dytë për të pranishmit bëhet prezantimi i kaligrafisë japoneze nga znj. Taki Kodaira. Ajo shpjegoi fillesat e lidhjes gjuhësore të kaligrafisë kineze me atë japoneze, duke sjellë formën e shkrimit SHODO me anë të kaligrafisë KANJI e huazuar. Kjo pjesë u bë shumë interaktive, pasi pjesëmarrësit u përfshinë në imitime të ndryshme të kaligrafisë japoneze.

Kjo pjesëmarrje vijoi edhe gjatë pjesës së tretë, gjatë së cilës u mbajt një kurs për fillestarë i gjuhës japoneze nga Znj. Mayumi Mitsuya. Ishte interesante të shikoje të pranishmit, tek përfshiheshin me dëshirë në dialogjet e shkurtër prezantues në gjuhën japoneze si p.sh Ohayoo gozaimasu (Mirëmëngjesi), Konnichiwa (Mirëdita), Konbanwa (Mirëmbrëma), Sayoonara (Mirë u pafshim) dhe Arigatoo gozaimasu (Faleminderit).
Në pjesën e fundit, por jo më pak e rëndësishme, pjesëmarrësit rrugëtuan virtualisht në traditën dhe kulturën e turizmit në Japoni. Prezantimi u mbajt nga Z. Masaki Yamazaki, Sekretari i Parë i Ambasadës së Japonisë në Romë.

I gjithë prezantimi u moderua nga znj. Yukiko Constantinescu, duke i ardhur në ndihmë audiencës për përkthimin nga japonishtja në anglisht. Gjithashtu një falënderim i veçantë i shkon Anisa Brano, Dritan Fino, Eurona Leka dhe Silio Stefani për mbarëvajtjen dhe koordinimin e aktivitetit. Ky ishte një aktivitet unik në llojin e tij, por edhe me interes për vazhdimësinë e kurseve të gjuhës japoneze, si instrumenti kryesor i përçimit të kulturës, jetës dhe traditave të një vendi.