• 2014-03-29

Veprimtaritë ndërkombëtare me karakter studimor e kërkimor, jane bërë pjesë e vazhdueshme dhe e programuar e Departamentit të Qeverisjes, Politikës dhe Komunikimit në Universitetin Barleti. E tillë ishte edhe vizita studimore e ditës së shtunë, dt 29 mars 2014, gjatë së cilës pedagogë të departamentit dhe studentë të shkencave politike dhe juridike zhvilluan një udhëtim një ditor në qytetet e Prishtinës dhe Prizrenit. Në Prishtinë ata morën pjesë në një leksion prezantues me Ministrin e Infrastrukturës të Republikës së Kosovës, Z. Fehmi Mujota.

Autobusi arriti rreth orës 10.30, grupi nga Tirana u prit në hyrje të ministrisë nga këshilltari politik i z. Mujota, z. Zenel Kelmendi, i cili i shoqëroi pedagogët dhe studentet në sallën e përgatitur enkas për këtë takim. Z. Kelmendi pasi i falënderoi të pranishmit për ardhjen dhe për interesin për të njohur nga afër këtë sektor të Republikës së Kosovës, të rëndësishëm për marrëdhëniet e të dy vendeve, bëri një përshkrim të shkurtër të profilit dhe angazhimeve politike të ministrit si anëtar i Kryesisë Qendrore të Partisë Demokratike të Kosovës, sekretar Organizativ i Kryesisë Qendrore të PDK-së, deputet i Kuvendit të Kosovës në dy mandate etj.

Më pas fjalën e mori Dr. Zamira Ҫavo, drejtuesja e departamentit, e cila pasi falënderoi në emër të Universitetit Barleti ministrin për pritjen, theksoi se takime të tilla duhen realizuar më shpesh, sepse jemi një komb i ndarë në dy shtete dhe duhet të intensifikojmë edhe lidhjet akademike dhe studimore midis dy vendeve.
Z. Mujota në fillim të fjalës së tij, theksoi së Shqipëria dhe marrëdhënia e saj më Kosovës kanë qenë shumë jetike për shtetin e ri, sidomos në periudhën e luftës, në rehabilitimin e të ardhurve nga Kosova, por edhe më vonë në mëkëmbjen e ekonomisë, gjendjes sociale dhe infrastrukturës.
Në prezantimin e tij " Sfidat e zhvillimit të infrastrukturës nën perspektivat e konsolidimit të shtetit dhe Integrimit Europian të Kosovës" ministri Mujota, evidentoi programet dhe punën e institucionit që ai drejton për zhvillimin e infrastrukturës në veçanti dhe atij social ekonomik të Kosovës në përgjithësi, duke i cilësuar ato si tepër jetike për integrimin rajonal dhe Europian të Kosovës.

Gjithashtu në detaje z.Mujota evidentoi treguesit e zhvillimit të infrastrukturës në të gjithë territorin e shtetit të Kosovës, duke nënvizuar se investimet janë realizuar me buxhetin e qeverisë së shtetit të ri, e cila me seriozitet dhe përpikmëri ka mirë administruar burimet për grumbullimin e tyre.
Rëndësi të veçantë i kushtoi edhe prioriteteve të qeverisjes së Kosovës për ta lidhur shtetin e ri me rrjetin rajonal të infrastrukturës, ku Shqipëria përbën prioritetin kryesor nëpërmjet portit të Durresit dhe rrugës së Kombit, si dhe lidhjes me trojet shqiptare veriore në Malin e zi. Ministri Mujota nuk anashkaloi edhe rëndësinë gjeostrategjike të Shqipërisë dhe Kosovës nën ritmet e zhvillimeve europiane dhe më gjerë.
Më pas Ministri Mujota, iu përgjigj pyetjeve dhe interesave të pedagogëve dhe studenteve të pranishëm në takim, duke demostruar një takim miqësor, të ngrohtë dhe vëllazëror në çdo detaj të komunikimit.

Dhe në mbyllje të takimit, Dr. Reis Mulita, midis të tjerash e falenderoi ministrin Mujota, edhe për faktin se autostrada e re që lidh kufirin e Shqipërisë, Prizrenin dhe Prishtinën, e ndërtuar kohët e fundit, i krijoi mundësinë studenteve të vëzhgojnë drejtpërdrejtë modelin e infrastrukturës rrugore të ndërtuar nën parametrat e zhvillimit të qëndrueshëm, njohuri të cilat i kanë marrë vetëm në auditorët e Universitit Barleti, sepse në Shqipëri janë një realitet i munguar.

Në vijim pedagogët dhe studentë ndoqën një prezantim studimi kërkimor të programuar si pjesë e veprimtarisë në Prishtinë.
Vizita njohëse studimore me Shtëpinë e Lidhjes Shqiptare të Prizrenit, ishte pjesa e programit të ngjeshur por edhe mbreslenës të veprimtarisë së programuar, e cila u vlerësua si tepër e dobishme dhe me vlerë nga studentët pjesëmarrës në veprimtari.
Midis mbresave të veçanta, dhurata simbolike me simbolet e Ministrisë së Infrastrukturës së Republikës së Kosovës, dhuruar për të gjithë të pranishmit nga Ministri Fehmi Mujota, shoqëruan grupin e studentëve dhe pedagogëve të UB.