Ndërkombëtarizimi i UniBa

2023-07-07

Nga data 03 - 07 Korrik 2023, Dekani i Fakultetit të Shkencave Sociale Turizmit dhe Sportit, Prof. Dr. Artan Shytaj dhe Përgjegjësi i Departamentit të Edukimit Fizik dhe Sportit, Dr. Artan Pogoni, në kuadër të projektit Erasmus+, zhvilluan një javë takime, vizita dhe leksione në University of Szczecin të Polonisë.

Dekani i Fakultetit Z. Shytaj dhe Përgjegjësi i Departamentit Z. Pogoni u pritën në një takim të vecantë nga Dekani i Fakultetit të Shëndetësisë dhe Edukimit Fizik, Prof. Assoc. Dr. Marta Stępień -Słodkowska, me të cilën u diskutuan lidhja e marrëveshjes bilaterale ndërmjet dy fakulteteve, shkëmbimi i ekperiencave të stafit akademik në të ardhmen, problematikat kurrikulare, mobilitetet e studentëve në kuadër të Erasmus+, etj.

Po kështu delegacioni i UniBa u prit në takime të vecanta edhe nga Joanna Szwak - Shef i Njësisë për Mbështetjen e Kërkimeve - Instituti i Shkencave të Kulturës Fizike si dhe nga Joanna Czarnecka – Shef i Zyrës Ndërkombëtare.

Vizitat në auditorë, laboratorë dhe ambjente të këtij Universiteti sjellin një eksperiencë të re për UniBa dhe sidomos për Departamentin e Edukimit Fizik dhe Sportit në kuadër të Internacionalizimit të veprimtarisë së tij.

Në kuadër të këtij bashkëpunimi nuk mungoi edhe ftesa që delegacioni i UniBa u bëri drejtuesve të këtij Universiteti për një vizitë së shpejti pranë Universitetit tonë UniBa.