
Në kuadër të projektit Research Universities (RES-UNI), i bashkëfinancuar nga Bashkimi Evropian përmes programit Erasmus+ për Ndërtimin e Kapaciteteve në Arsimin e Lartë, Universiteti Fırat në Elazığ, Turqi, po zhvillon seanca trajnimi online me studentë të përzgjedhur nga universitetet partnere, mes tyre edhe Universiteti Barleti.
Trajnimet janë përqendruar në Transformimin Digjital, me synimin për të thelluar njohuritë dhe aftësitë e studentëve në fushat kyçe të teknologjisë bashkëkohore dhe inovacionit. Përmes këtij programi, studentët e Universitetit Barleti marrin pjesë në një përvojë ndërkombëtare mësimore, duke ndjekur ligjërata dhe ushtrime praktike të udhëhequra nga ekspertë të Universitetit Fırat.
Programi i trajnimit përfshin tematika si:
- Transformimi Digjital
- Big Data
- Menaxhimi i të Dhënave
Ky aktivitet synon të forcojë kompetencat digjitale të studentëve dhe të nxisë bashkëpunimin ndëruniversitar në kuadër të projektit RES-UNI.
Pjesëmarrja e studentëve të Universitetit Barleti në këtë program përfaqëson një hap të rëndësishëm drejt përfshirjes aktive në proceset e transformimit digjital dhe inovacionit akademik në nivel rajonal dhe evropian.
