Studentët e vitit të tretë të programit të studimit "Edukim Fizik dhe Sporte" zhvilluan praktikën mësimore në kuadër të lëndëve "Guidë Turistike" dhe "Menaxhim Turizmi", me fokus në Trashëgiminë Kulturore. Gjatë kësaj praktike, ata patën mundësinë të demonstrojnë aftësitë e tyre në menaxhimin dhe udhëheqjen e një grupi turistik, duke zbatuar në terren njohuritë teorike të përfituara në auditor.
Studentët vizituan disa nga destinacionet më të njohura turistike të Tiranës, si Sheshin Skënderbej, Muzeun Historik Kombëtar, Xhaminë e Et'hem Beut, Pazarin e Ri, Piramidën, Katedralen Ortodokse "Ringjallja e Krishtit", Kullën e Sahatit, Këmbanën e Paqes, Postbllokun e Tiranës, Instalacionin "Reja", Memorialin e Pavarësisë, Urën e Tabakëve, Vilën e Sali Shijakut, Tyrben e Kapllan Pashës, Kalanë e Tiranës, Shtëpinë e Gjetheve, BunkArt 2 dhe Arenën "Air Albania Stadium".
Kjo eksperiencë praktike synon t'i përgatisë studentët për sfidat reale në sektorin e turizmit, duke i aftësuar për të menaxhuar grupe turistike dhe për të promovuar trashëgiminë kulturore shqiptare në mënyrë profesionale.