Më datë 30 Tetor 2015, Instituti Shqiptar për Çështjet Publike organizoi një tryezë debati me pjesëmarrjen e përfaqësuesve të shoqërisë civile dhe studentëve të universitetit “Barleti” ku u prezantuan gjetjet e studimit mbi “Sfidat e përfshirjes së shoqërisë civile Shqiptare në negociatat për anëtarësim në BE dhe mënyrat për tejkalimin e tyre” duke u nisur nga përvojat konkrete dhe praktikat më të mira të vendeve të tjera në rajonin e Ballkanit.
Përfaqësuesja e Institutit për Demokraci dhe Ndërmjetësim, znj. Aleka Papa, shpjegoi synimet e programit të mbështetur nga Rrjeti Ballkanik për Zhvillimin e Shoqërisë Civile dhe veprimtaritë e zhvilluara nga IDM në kuadrin e tij, si dhe vlerësoi punën e kryer nga Dr. Jano në hartimin e studimit “Sfidat e përfshirjes së shoqërisë civile Shqiptare në negociatat për anëtarësim në BE dhe mënyrat për tejkalimin e tyre”.
Dr. Dorian Jano, Drejtor Ekzekutiv i Institutit Shqiptar për Çështjet Publike, autor i studimit parashtroi një përmbledhje mbi gjetjet dhe përvojat e përfshirjes së shoqërisë civile nga vendet e rajonit në negociatat për aderim në Bashkimin Evropian. Prezantimi i tij u prit me mjaft interes nga të pranishmit të cilët bënë pyetje dhe komente rreth temës. Ndër çështjet e ngritura ishin se sa ishte marrë në konsideratë mendimi i shoqërisë shqiptare në negociatat për aderim në BE, cili është mendimi i sindikatave të punëdhënësve, të biznesit, apo grupeve të tjera të interesit për hyrjen në Bashkimin Evropian, sa e gatshme është shoqëria shqiptare për tu bërë pjesë e BE-së, etj.
Studimin mund ta gjeni të plotë në këtë adresë: www.aipa.al