• 2012-05-29

Universiteti "Barleti" në bashkëpunim me Universitetin e Tiranës dhe Universitetin Europian të Tiranës, organizuan në Tiranë, nga 25 deri më 29 maj 2012, takimin e parë ndërkombëtar të planifikuar në axhendën e aktiviteteve të këtij projekti trevjeçar, financuar nga Komisioni Europian.

Seanca plenare u zhvillua në datën 26 maj 2012 me pjesëmarrjen e përfaqësuesve të universiteteve të rajonit të Ballkanit Perëndimor dhe disa nga vendet e Bashkimit Europian, Prishtinë (Kosovë), Sarajevë dhe Zenica (Bosnje-Herzegovinë), Podgoricë dhe Donja Gorica (Mali i Zi), Beograd, Novi Sad dhe Kragujevac (Serbi), Gotenburg (Suedi), Manheim (Gjermani), Galëay (Irlandë), pedagogë e drejtues të projektit nga Universiteti i Roehamptonit (Mbretëria e Bashkuar) si dhe të akademikëve e studentëve nga universitetet e Tiranës. Të ftuar ishin dhe përfaqësues të institucioneve të pavarura, Avokati i Popullit, z. Igli Totozani, Komisionierja kundër diskriminimit, znj. Irma Baraku, drejtues të OJF që janë aktive në mbrojtjen e të drejtave të njeriut, znj. Elsa Ballauri, drejtore e Grupit shqiptar për të Drejtat e Njeriut, znj. Sendrine Constant, drejtore e Terre des Hommes, znj.Blerta Çani, drejtore e Fondacionit shqiptar për mbrojtjen e drejtave të njerëzve me aftësi të kufizuar, znj.Aurela Bozo nga Qendra për Nisma ligjore etj.

Në fjalën e tyre përshëndetëse Rektorët e tri universiteteve mikpritës - pjesëmarrës në projekt, vlerësuan ecurinë e projektit, evidentuan përvojat dhe praktikat e deri sotme në procesin e edukimit të të drejtave të njeriut në institucionet e arsimit të lartë në Shqipëri dhe theksuan rëndësinë e rritjes cilësore të tij dhe të bashkëpunimit ndërinstitucional për arritjen e këtij objektivi.

Rektori i Universitetit "Barleti", Profesor Marenglen Spiro, ndër të tjera vuri në dukje se "UB e ka vlerësuar dhe është përfshirë në këtë projekt të rëndësishëm europian me një staf të kualifikuar dhe eksperiencë të gjatë akademike, sepse institucioni ynë e konsideron problemin e Të Drejtave të Njeriut si një çështje të rëndësishme të zhvillimit bashkëkohor shoqëror, për të cilën universitetet dhe shkollat e larta duhet të zhvillojnë mësimdhënie të integruar dhe specifike, tNULLi formojnë studentët me parimet themelore e të ndikojnë në komunitete lokale e më gjërë për njohjen, zbatimin dhe mbrojtjen e tyre.

Një specialist i lartë sot duhet të jetë i formuar me Të Drejtat e Njeriut. Kjo nuk nënkupton vetëm njohjen me parimet dhe legjislacionin, por lidhet ngushtësisht me të kuptuarit të ndërgjegjshëm prej tij të parimeve përkatëse si dhe me vlerën dhe efektivitetin në komunikimin e kooperimin njerëzor".

Gjatë seancave të para punës, të zhvilluara në UT dhe UET u raportua puna kërkimore e kryer në funksion të objektivave të projektit, në secilin prej universiteteve për analizën e situatës konkrete lidhur me mësimdhënien e lëndëve për të Drejtat e Njeriut, krijimin e një harte të çdo institucioni që evidenton vendin e këtyre lëndëve në curriculat e përgjithshme; si dhe problematikat e evidentuara nga analiza e fokus grupeve me studentë, akademikë dhe punonjës lidhur me njohjen dhe respektimin e të drejtave të njeriut brenda dhe jashtë universiteteve.

Dita e tretë e takimit u zhvillua në mjediset e Universitetit Barleti. Ajo filloi me një lajm të gëzuar për studentët e universitetit. Në konkursin për krijimin e logos që do të mbajë për tre vjet ky projekt, i mbiquajtur HEART (Higher Education Action for Rights Teaching) juria e përbërë nga Komiteti Drejtues i projektit, me 21 anëtarë pjesëmarrës në takimin e Tiranës, zgjodhi si fituese logon e krijuar nga Mirjan Petro, student në UB, viti i parë.

Projekti parashikon në vitin e dytë të zbatimit të tij, shkëmbime përvojash rajonale për praktikat më të mira të mësimdhënies së të drejtave të njeriut, dhe në vitin e tretë edhe të studentëve të angazhuar më shumë në këtë fushë.

Komiteti Drejtues konkludoi se të gjithë objektivat e kësaj faze janë realizuar dhe vendosi që takimi i dytë të zhvillohet në 5-9 tetor 2012, nën kujdesin e Universiteteve të Malit të Zi.