English
Shqip
Diplomë "Master i Shkencave": Menaxhim Biznesi dhe Transformimi Dixhital
Programi i studimit i ciklit të dytë “Master i Shkencave” në “Menaxhim Biznesi dhe Transformimi Dixhital” është një program bashkëkohor, i projektuar për të përgatitur profesionistë dhe drejtues të aftë për të udhëhequr proceset e transformimit dixhital në organizata publike dhe private. Programi ndërthur njohuritë e avancuara në menaxhimin e biznesit me kompetencat në teknologjitë dixhitale, inovacionin, analizën e të dhënave dhe transformimin organizativ, me qëllim rritjen e efikasitetit, përmirësimin e proceseve të biznesit dhe krijimin e avantazheve konkurruese të qëndrueshme.
Ky program synon të formojë profesionistë me aftësi analitike, strategjike dhe drejtuese, të cilët janë të aftë të zhvillojnë dhe zbatojnë strategji të transformimit dixhital në një gamë të gjerë organizatash, duke përfshirë bizneset private, organizatat jofitimprurëse, institucionet financiare, institucionet publike në nivel qendror dhe vendor, si edhe organizata të tjera që operojnë në një mjedis ekonomik gjithnjë e më të dixhitalizuar.
Në përfundim të studimeve, të diplomuarit do të jenë në gjendje të analizojnë sfidat e transformimit dixhital, të hartojnë dhe menaxhojnë projekte inovative, të integrojnë teknologjitë dixhitale në proceset organizative, të mbështesin vendimmarrjen strategjike përmes analizës së të dhënave dhe të udhëheqin ndryshimin organizativ në përputhje me praktikat më të mira ndërkombëtare.
Programi i studimit zhvillohet nga staf akademik i kualifikuar dhe me përvojë, në përputhje të plotë të legjislacionit shqiptar dhe me infrastrukturë moderne që përmbush më së miri standardet dhe kërkesat e studentëve.
Diplomë "Master i Shkencave": Menaxhim Biznesi dhe Transformimi Dixhital
Plani mësimor - Master i Shkencave në Menaxhim Biznesi dhe Transformimi Dixhital (PDF)
Diplomë "Master i Shkencave": Menaxhim Biznesi dhe Transformimi Dixhital
Në përfundim të studimeve, studenti pajiset me diplomë dhe suplementin e diplomës, të miratuara nga Ministria e Arsimit. Mundësitë e punësimit për studentët e diplomuar në programin e studimit “Master i Shkencave” në “Menaxhim Biznesi dhe Transformimi Dixhital” janë:
- Menaxher i transformimit dixhital;
- Menaxher i marketingut dixhital;
- Konsulent i Biznesit dhe Teknologjisë;
- Menaxher i operacioneve financiare;
- Menaxher në inovacionin dixhital;
- Analist i të dhënave dhe strategjive;
- Analist i biznesit dixhital, etj.
Diplomë "Master i Shkencave": Menaxhim Biznesi dhe Transformimi Dixhital
Pranimi në programet e studimit të ciklit të dytë “Master i Shkencave” të “Universitetit Barleti” realizohet në përputhje me legjislacionin e arsimit të lartë, rregullat dhe udhëzimet përkatëse të Ministrisë së Arsimit dhe Sportit (MA).
Në programet e studimit të ciklit të dytë “Master i Shkencave” pranohen për të ndjekur studimet shtetasit shqiptarë ose të huaj që përmbushin kriteret e mëposhtme:
- Vërtetojnë me një dokument zyrtar (Diplomë) mbarimin e studimeve të ciklit të parë “Bachelor” në një IAL brenda ose jashtë vendit, ekuivalentuar sipas kritereve të përcaktuara nga Ministria përgjegjëse për arsimin e lartë;
- Zotërojnë vërtetim të listës së notave dhe krediteve / suplementin e diplomës;
- Vërtetojnë me një dokument zyrtar (Dëshmi të gjuhës) njohjen e njërës prej pesë gjuhëve të huaja të Bashkimit Europian (anglisht, frengjisht, gjermanisht, italisht, spanjisht), të paktën në nivelin B1, sipas përcaktimeve të MA. Nëse kandidati ka fituar një diplomë të një programi studimi të kryer në një nga këto gjuhë, diploma e fituar shërben si dëshmi për plotësimin e këtij kriteri. Niveli i njohjes së gjuhës së huaj përcaktohet sipas akteve nënligjore, Udhëzimit Nr. 52, datë 03.12.2015 “Për përcaktimin e niveleve të gjuhëve të huaja dhe të testeve ndërkombëtare, për pranimet në programet e studimit të ciklit të dytë, në institucionet e arsimit të lartë”, ndryshuar me Udhëzimin Nr. 10, datë 16.06.2023;
- Vërtetojnë me dokumente zyrtare transferimin nga një shkollë universitare publike ose jo publike, brenda ose jashtë vendit;
- Disponojnë kartë identiteti / pasaportë të vlefshme;
- Disponojnë jetëshkrim (CV) + 2 (dy) fotografi dokumenti;
- Pranojnë të shlyejnë tarifën e studimit të përcaktuar në marrëveshjen mes institucionit dhe studentit.
Gjithashtu, një tjetër kriter pranimi për aplikim në këtë program studimi do të jetë ai i vlerësimit të aftësisë së aplikantit në fushën e studimit në formimin pararendës në ciklin e parë “Bachelor”, ose mbi bazë të aftësive dhe kërkesave të vendit të punës ku është i punësuar aplikanti. Kjo aftësi gjykohet nga një komision specialistësh nga departamenti që mbulon programin përkatës të studimit në UniBa dhe certifikohet nga Dekani i Fakultetit.
Pranimi i studentëve bëhet bazuar në kuotat e përcaktuara nga UniBa dhe të miratuara nga MA, në përputhje me standardet e përcaktuara nga MA, aktet ligjore e nënligjore në fuqi dhe rregulloret e UniBa. Procesi i pranimit / regjistrimit vijohet me nënshkrimin e marrëveshjes dhe mbyllet me marrjen e numrit të matrikulimit nga QSHA.
Diplomë "Master i Shkencave": Menaxhim Biznesi dhe Transformimi Dixhital
Tarifa e studimit në programin e studimit “Master i Shkencave” në “Menaxhim Biznesi dhe Transformimi Dixhital”, të ofruar nga “Universiteti Barleti”, është ndër më konkurrueset në treg, pasi synohet akses më i madh në arsimin e lartë për të gjithë të interesuarit duke ofruar mundësi të favorshme financiare. Likuidimi i tarifës së studimit kryhet me 2 (dy) këste.
Kohëzgjatja normale e programit të studimit është 2 (dy) vite akademike. Akordimi i një viti shtesë akademik shoqërohet me aplikimin e një tarife studimi shtesë. Ndërkaq, kohëzgjatja maksimale e studimeve, pa marrë në konsideratë periudhën e pezullimit, është 4 (katër) vite akademike.
Diplomë "Master i Shkencave": Menaxhim Biznesi dhe Transformimi Dixhital
