English
Shqip
Diplomë "Master i Shkencave": Financë dhe Teknologji (FinTech)
Programi i studimit të ciklit të dytë “Master i Shkencave” në “Financë dhe Teknologji” ofron një kombinim unik të njohurive në fushat e financës dhe teknologjisë, duke përgatitur studentët për të përballuar sfidat komplekse të tregut financiar modern dhe për të përdorur teknologjitë e fundit në funksion të një oferte të pasur me zgjidhje inovative financiare. Ky program është krijuar për të integruar teorinë financiare me praktikat e avancuara teknologjike dhe me qëllim përgatitjen e studentëve për role udhëheqëse në sektorët financiar dhe teknologjik.
Zhvillimi dinamik i sistemit financiar dhe strukturimi i tij në një kontekst gjithnjë e më konkurrues dhe inovativ kërkon edukimin e një elite të re të menaxherëve të ardhshëm në fushën e financës dhe teknologjisë, njohuritë dhe aftësitë e të cilëve do të garantojnë konkurrueshmëri dhe sukses në botën financiare dhe në tregun dinamik të punës.
Diploma e ciklit të dytë “Master i Shkencave” në “Financë dhe Teknologji” pajis të diplomuarit me njohuri të thelluara mbi sektorin financiar që integrohen me aftësimin profesional të studentëve në programimin kompjuterik dhe përdorimin e teknologjisë, me qëllim krijimin e shërbimeve financiare të reja dhe të përmirësuara, sipas tendencave të fundit të teknologjisë financiare që po transformojnë industrinë e shërbimeve financiare në bankat dhe institucionet e tjera financiare të së ardhmes.
Programi i studimit ofrohet nga personel akademik i kualifikuar dhe me përvojë, zhvillohet në përputhje të plotë të legjislacionit shqiptar dhe me infrastrukturë moderne që përmbush më së miri standardet dhe kërkesat e studentëve.
Diplomë "Master i Shkencave": Financë dhe Teknologji (FinTech)
Plani mësimor - Master i Shkencave në Financë dhe Teknologji (FinTech) (PDF)
Diplomë "Master i Shkencave": Financë dhe Teknologji (FinTech)
Në përfundim të studimeve, studenti pajiset me diplomë dhe suplementin e diplomës, të miratuara nga Ministria e Arsimit dhe Sportit.
Mundësitë e punësimit për studentët e diplomuar në programin e studimit “Master i Shkencave” në “Financë dhe Teknologji” janë:
- Menaxher i bankingut dixhital
- Drejtues/ analist/ konsulent në kompanitë Insurtech
- Drejtues/ analist/ konsulent në kompanitë Fintech
- Menaxhues për Riskun strategjik
- Menaxher i operacioneve financiare
- Menaxher i tregut të kriptovalutave
- Menaxher/ konsulent në investime dhe në tregtimin e letrave me vlerë
- Drejtues i financave të korporatës
- Menaxher në tregti elektronike
- Menaxher në inovacionin dixhital
- Menaxherë kërkimi/ zhvillimi në kompanitë e shërbimeve financiare, etj.
Diplomë "Master i Shkencave": Financë dhe Teknologji (FinTech)
Pranimi në programet e studimit të ciklit të dytë “Master i Shkencave” të “Universitetit Barleti” realizohet në përputhje me legjislacionin e arsimit të lartë, rregullat dhe udhëzimet përkatëse të Ministrisë së Arsimit dhe Sportit (MAS).
Në programet e studimit të ciklit të dytë “Master i Shkencave” pranohen për të ndjekur studimet shtetasit shqiptarë ose të huaj që përmbushin kriteret e mëposhtme:
- Vërtetojnë me një dokument zyrtar (Diplomë) mbarimin e studimeve të ciklit të parë “Bachelor” në një IAL brenda ose jashtë vendit, ekuivalentuar sipas kritereve të përcaktuara nga Ministria përgjegjëse për arsimin e lartë;
- Zotërojnë vërtetim të listës së notave dhe krediteve / suplementin e diplomës;
- Vërtetojnë me një dokument zyrtar (Dëshmi të gjuhës) njohjen e njërës prej pesë gjuhëve të huaja të Bashkimit Europian (anglisht, frengjisht, gjermanisht, italisht, spanjisht), të paktën në nivelin B1, sipas përcaktimeve të MAS. Nëse kandidati ka fituar një diplomë të një programi studimi të kryer në një nga këto gjuhë, diploma e fituar shërben si dëshmi për plotësimin e këtij kriteri. Niveli i njohjes së gjuhës së huaj përcaktohet sipas akteve nënligjore, Udhëzimit Nr.52, datë 03.12.2015 “Për përcaktimin e niveleve të gjuhëve të huaja dhe të testeve ndërkombëtare, për pranimet në programet e studimit të ciklit të dytë, në institucionet e arsimit të lartë”, ndryshuar me Udhëzimin nr. 10, datë 16.06.2023;
- Vërtetojnë me dokumente zyrtare transferimin nga një shkollë universitare publike ose jo publike, brenda ose jashtë vendit;
- Disponojnë kartë identiteti / pasaportë të vlefshme;
- Disponojnë jetëshkrim (CV) dhe 2 (dy) fotografi dokumenti;
- Pranojnë të shlyejnë tarifën e studimit të përcaktuar në marrëveshjen mes institucionit dhe studentit.
Gjithashtu, një tjetër kriter pranimi për aplikim në këtë program studimi do të jetë ai i vlerësimit të aftësisë të aplikantit në fushën e studimit në formimin pararendës në ciklin e parë “Bachelor”, ose mbi bazë të aftësive dhe kërkesave të vendit të punës ku është i punësuar aplikanti. Kjo aftësi gjykohet nga një komision specialistësh nga departamenti që mbulon programin përkatës të studimit në UniBa dhe certifikohet nga Dekani i Fakultetit.
Pranimi i studentëve bëhet bazuar në kuotat e përcaktuara nga UniBa dhe të miratuara nga MAS, në përputhje me standardet e përcaktuara nga MAS, aktet ligjore e nënligjore në fuqi dhe rregulloret e UniBa. Procesi i pranimit/regjistrimit vijohet me nënshkrimin e marrëveshjes dhe mbyllet me marrjen e numrit të matrikulimit nga QSHA.
Diplomë "Master i Shkencave": Financë dhe Teknologji (FinTech)
Tarifa e studimit në programin e studimit “Master i Shkencave” në “Financë dhe Teknologji”, të ofruar nga “Universiteti Barleti”, është ndër më konkurrueset në treg, pasi synohet akses më i madh në arsimin e lartë për të gjithë të interesuarit duke ofruar mundësi të favorshme financiare.
Likuidimi i tarifës së studimit kryhet me 2 (dy) këste.
Kohëzgjatja normale e programit të studimit është 2 (dy) vite akademike. Akordimi i një viti shtesë akademik shoqërohet me aplikimin e një tarife studimi shtesë.
Ndërkaq, kohëzgjatja maksimale e studimeve, pa marrë në konsideratë periudhën e pezullimit, është 4 (katër) vite akademike.
Diplomë "Master i Shkencave": Financë dhe Teknologji (FinTech)
