Universiteti Barleti, organizoi online, në datën 19.11.2020, Konferencën e parë Ndëruniversitare Akademike, me temë “Sfidat e Arsimit të Lartë dhe Kërkimit të Aplikuar në Shqipëri”.
Kjo konferencë, u organizua në kuadër të forcimit të bashkëpunimit midis universiteteve shqiptare dhe të zhvillimit të këtij komuniteti shumë të rëndësishëm të ekosistemit të edukimit dhe përgatitjes për tregun e punës.
Kriza covidiane, ka ndryshuar mënyrën e komunikimit dhe disa zakone të jetës sonë profesionale dhe shoqërore por nuk ka ndalur përpjekjet dhe punën e stafeve universitare për të cuar përpara misionin e rëndësishëm të krijimit dhe transferimit të dijes dhe pajisjes së studentëve me aftësi dhe kompetenca për tregun në transformim të vazhdueshëm.
Pjesëmarrësit diskutuan mbi sfidat e arsimit të lartë dhe kërkimit të aplikuar si elementë të rendësishëm në zhvillimet ekonomike, shoqërore dhe politike të vendit dhe të rajonit. Idetë e punimeve, debatet dhe diskutimet që pasuan, u kurorëzuan me gjetje dhe sygjerime për arsimin, ekonominë, turizmin, politikbërjen dhe vendimarrjen në fusha të ndryshme ku kërkimi shkencor i aplikuar dhe novacioni është forca lëvizëse.